Rut 2 | KYG | STEP | Neyomi negafo'amo agi'amo Movasi'ae. Ani vekamo ala agi vekamo mai'neno Neyomi anau'amo'mo fali'niya vekamo Elimeleki nofi vayapati vekamo mai'niye.

Ruth 2

Luti'a Movasi hoyalegamo u'niya gemae

1 Neyomi negafo'amo agi'amo Movasi'ae. Ani vekamo ala agi vekamo mai'neno Neyomi anau'amo'mo fali'niya vekamo Elimeleki nofi vayapati vekamo mai'niye. 2 Luti'a Neyomife'mo, Hoyalegamo ute'na mali avoyamo hatagau'a atalesaya mali alagamo alime alime uguve. Mago vekamo'mo he, kanalene, huno hisige'na aiyaka ali'na alime alime visuvana kanalepiye, huno afi ge'nigeno'ae'mo Neyomi'a, he kanalenagi, nanofelo'nimogamo afa'a uka ani kava huvo, huno ha pai'niye. 3 Ha pai'nigeno Luti'a hoyalega uteno mali avoyamo hatagau'a ataleme u'naya vaya'ai apaiyakamo alino alime alime u'niye. Ina la hoyafi'mo e'na mai'nofi huno agesamo o'afi'niyana Movasi'a Elimeleki nofi vayapati vekamo hoyafike'mo eno ali'ya'mo ali'niye. 4 Ali'ya'mo ne'aligeno'ae'mo Movasi'a Metelehamu taonifati'mo eno ava'yi huteno ali'ya'amo ne'aliya vaya'aife'mo, Ala kava ne'mo'a lapakae'e'mo magokepi lokaeno maino, huno ke apamamae'nige'apae'mo ge'ale'mo ae'a atagaina hu'a, Ala kava ne'mo'a kaha maeno, hu'a ha pai'nae. 5 Movasi'a kava ne'ae'mo, Uma venemo a kanomo haiya kotega a kanoe, huno 6 afi ge'nigeno'ae'mo, Alu kotegati'mo Neyomi'e'mo lokaeno e'niya a kanomo Movapu kotega a kanomo mai'niye. 7 Netepi'mo eno nagaefe'mo, Ali'ya'mo ne'aliya vaya'ai apaiyakamo ali'na mali avoyamo alime alime ugesuve, huno ge huno nafi ge'nige'nae'mo he, hu'na ha pai'nogeno ali'ya'mo alime alime eno hemenitomo uluna nopi'mo maino falu hu'niye, huno ha pai'niye. 8 Movasi'a uno Lutife'mo, Ge'nimo alagepa huka afiyo. Uka alu vaya'ai hoyafati'mo mali avoyamo alika anupa osuvo. Mani hoyafike'mo ali'ya'nimo ne'aliya a'ne anaga'e'mo magokepi lokaeka ali'ya'mo aliyo. 9 Malimo nehatagaya vaya'mo haiyate'mo ali'ya'mo ne'alifigi apakeka alagepa hu malo. Apaketekae'mo ali'ya'nimo ne'aliya a'ne anaga'mo apakame huka magokepi lokaeka ali'ya'mo aliyo. Nagae ali'ya'mo ne'aliya neya vaya'aife'mo, Hanageke ya'mo o'amiyo, hu'na ago hapa pai'nove. Anife'mo kahausigekae'mo uka yafa kepi'mo he fili e'a male'naya aniteti'mo alika no, huno ha pai'niye. 10 Ha pai'nigeno Luti'a ape huno mopafi'mo ale'ya faino mai'neno'ae'mo, Nagaemo alu kotega a kanomo mai'nova'monanafa na kava higekae'mo alagepa kaulagamo ne'nagane, huno ha pai'nigeno 11 Movasi'a, Anaukamo'mo ago fali'nigeka kanofelokamofe'mo alagepa huno kahau'niya kavafe'mo kava gemo ago afi'nove. Afi'novana kokamogi itaka afokamogimogi huka ago apataleteka o'apake'nana vaya'e'mo mai'nane, hu'a kava gemo hu'nage'na afi'nove. 12 Ala kava ne'mo'a kaha maeno kamisigeka maiyo. Kagaemo eka Ala kava ne'mo Isaleli vaya'ai Goti'apimo hakufi'mo fala ki'nananageno alagepa huno yagaino kategaiye, huno ha pai'niye. 13 Ha pai'nigeno Luti'a, Nagaemo ina agufa a kanomo mai'ne'na kagae ali'ya'mo no'aluva a kanomo mai'nova'monanafa kaipamo'mo falu huka nate'nane. Aise gemo nehana ge'mo'mo alika lokiya vaika ne'natane, huno ha pai'niye. 14 Ne'ya'mo ne'ne'apae'mo Movasi'a Lutife'mo, Eka peleti mayamo alika nofi alagafati anipi'mo aeteka no, huno ha pai'niye. Luti'a ali'ya'mo ne'aliya vaya'e'mo itopale mai'nageno'ae'mo Movasi'a mali alagamo ago kae male'naya mali alagamo alino ami'nigeno neno amu hu'nigeno mago ne'ya'amo afa'a hane'niye. 15 Mago'e huno mali avoyamo alino anupa hisiyafe'mo he tino u'nigeno'ae'mo Movasi'a ali'ya'amo ne'aliya vaya'aife'mo, Mali hayamo ne'malaya yate'mo mago atale'nisaya mali avoyamo afa'a aligiyanagi ge ohaiyo. 16 Mali hayafati'mo mago alita halautapa male'nisageno alisigetapae'mo ge ohaiyo, huno hapa pai'niye. 17 Ani ge hu'nigeno'ae'mo Luti'a mali avoyamo alino anupa hume hume ne'vigeno'ae'mo yegemo lamino fale'niye. Kayoteti'mo alino amagi'nigeno mali alaga'age'mo mopafi'mo asagauno ai'nigeno kupi'mo alino ku ai'nigeno laisi kukana huno lusi kana hu'niye. 18 Taonifilagamo alinino uno anofelo'amo'mo ave liteno'ae'mo Movasi'a ami'nigeno neno amu huteno ali'niya ne'ya'e'mo alino anofelo'amo'mo ami'niye. 19 Neyomi'a Lutife'mo, Hemenimo mali avoyamo haiyateti'mo ali'nane. Ina la hoyafi'mo ali'ya'mo ali'nane. Ala kava ne'mo'a kaha mae'niya vekamo ha maeno amino, huno ha pai'nigeno, Mago vekamo agi'amo Movasi hoyafi'mo ali'ya'mo ali'nove, 20 Huno ha pai'nigeno Neyomi'a, Ala kava ne'mo'a ha maeno amino. Ala kava ne'mo'a fali'naya vaya'aitega'e afa'a ne'maiya vaya'aitega'e'mo ani kava huguve, huno hapa pai'niya kava'mo age okani'nigeno nehiye. Ani vekamo negafoti'amo'mogeno la'aha maesiya vekamo mai'niye, huno ha pai'niye. 21 Huno ha pai'nigeno Luti'a Movapu kotega a kanomo'mo huno'ae'mo, Movasi'a alagepa huno naha maeno naha paino'ae'mo, Ali'ya'nimo ne'aliya a'ne anaga'e'mo lokaeka mali avoyamo aliyo. Alime alime ne'uge'apao ani ali'ya'mo ali'a hano hiyo, huno naha pai'niye, huno ha pai'niye. 22 Neyomi'a Lutife'mo, He, Nanofelo, huno, Alu vekamo hoyalegamo visana'mo'mo mago vaya'mo kagaetegamo egae. Movasi hoyalega uka a'ne anaga'e'mo magokepi lokaeka ali'ya'mo alisana'mo'mo alagepa huka maigane, huno ha pai'niye. 23 Inagi Luti'a apakae'e'mo ali'ya'mo alime alime ne'vige'apae'mo mali avoyamo hatagau'a hano huge viti avoyamo hatagau'a hano huge hu'nae. Luti'a ali'ya'mo ne'alino'ae'mo anofelo'amo'e'mo lokaeno mai'niye.